എൻഎസ്എസ് ദിനാചരണം: ലഹരിവിരുദ്ധ പ്രതിജ്ഞയും പൊതിച്ചോറ് വിതരണവും സംഘടിപ്പിച്ചു

കുന്നുകര: എൻഎസ്എസ് ദിനാചരണത്തിന്റെ ഭാഗമായി എംഇഎസ് കോളേജ് ഓഫ് എൻജിനീയറിങ് ആൻഡ് ടെക്നോളജി, കുന്നുകരയിലെ നാഷണൽ സർവീസ് സ്കീമിന്റെ ആഭിമുഖ്യത്തിൽ ലഹരിവിരുദ്ധ പ്രതിജ്ഞയും പൊതിച്ചോറ് വിതരണവും സംഘടിപ്പിച്ചു.

‘ഓപ്പറേഷൻ തുഫാൻ’ എന്ന ലഹരിവിരുദ്ധ പ്രവർത്തനത്തിന്റെ ഭാഗമായി എൻഎസ്എസ് വളണ്ടിയർമാർ, കോളേജ് വിദ്യാർഥികൾ, അധ്യാപകർ, ജീവനക്കാർ എന്നിവർ ലഹരിവിരുദ്ധ പ്രതിജ്ഞയെടുത്തു. ലഹരിവസ്തുക്കൾ ഉപയോഗിക്കുകയോ പ്രോത്സാഹിപ്പിക്കുകയോ ചെയ്യില്ലെന്നും ലഹരിവിരുദ്ധ പ്രവർത്തനങ്ങളിൽ സജീവമായി പങ്കാളികളാകുമെന്നും പ്രതിജ്ഞയിൽ ഉറപ്പുനൽകി. യുവാക്കളെ ലഹരിയിൽനിന്ന് അകറ്റി ആരോഗ്യകരവും ഉത്തരവാദിത്തപൂർണവുമായ സമൂഹം കെട്ടിപ്പടുക്കുന്നതിൽ ഓരോരുത്തർക്കുമുള്ള പങ്ക് ഓർമിപ്പിക്കുന്നതായിരുന്നു പ്രതിജ്ഞ.

തുടർന്ന് എൻഎസ്എസ് ദിനത്തിന്റെ ഭാഗമായി അശരണർക്കും ദരിദ്രർക്കും ഭക്ഷണം വിതരണം ചെയ്യുന്ന സാമൂഹിക സേവന പ്രവർത്തനം സംഘടിപ്പിച്ചു. കോളേജിൽനിന്ന് ശേഖരിച്ച ഭക്ഷണസാധനങ്ങൾ എൻഎസ്എസ് വളണ്ടിയർമാരുടെ നേതൃത്വത്തിൽ ആവശ്യക്കാരിലേക്ക് എത്തിച്ചു. ആലുവ റെയിൽവേ സ്റ്റേഷൻ, ആലുവ ബസ് സ്റ്റാൻഡ്, ആലുവ മെട്രോ സ്റ്റേഷൻ പരിസരം, എറണാകുളം ജനറൽ ആശുപത്രി എന്നിവിടങ്ങളിലാണ് പൊതിച്ചോറുകൾ വിതരണം ചെയ്തത്. ഭക്ഷണവിതരണ പ്രവർത്തനത്തിന് എൻഎസ്എസ് പ്രോഗ്രാം ഓഫീസർ ഹാബിഷ് റിബിൻ നേതൃത്വം നൽകി.

കോളേജ് പ്രിൻസിപ്പൽ ഡോ. പ്രീത ആർ. നായർ പൊതിച്ചോറ് വിതരണത്തിന്റെ ഫ്ലാഗ് ഓഫ് കർമം നിർവഹിച്ചു. വൈസ് പ്രിൻസിപ്പൽ ഡോ. കെ. എം. രമേശ്, കമ്പ്യൂട്ടർ സയൻസ് ആൻഡ് എൻജിനീയറിങ് വിഭാഗം മേധാവി ബിജു പീറ്റർ, ഇലക്ട്രോണിക്സ് ആൻഡ് കമ്മ്യൂണിക്കേഷൻ എൻജിനീയറിങ്, ആർട്ടിഫിഷ്യൽ ഇന്റലിജൻസ് ആൻഡ് ഡാറ്റാ സയൻസ് വിഭാഗം മേധാവി ഡോ. ലക്ഷ്മി ആർ. നായർ, സിവിൽ എൻജിനീയറിങ് വിഭാഗം മേധാവി ഡോ. സന്തോഷ് ജി., മെക്കാനിക്കൽ എൻജിനീയറിങ് വിഭാഗം മേധാവി വിനു സെബാസ്റ്റ്യൻ, സയൻസ് ആൻഡ് ഹ്യൂമാനിറ്റീസ് വിഭാഗം മേധാവി നിഷമോൾ പി. എ., റോബോട്ടിക്സ് ആൻഡ് ആർട്ടിഫിഷ്യൽ ഇന്റലിജൻസ് വിഭാഗം മേധാവി ഡോ. ജിബി ജോബ് എന്നിവർ ആശംസകൾ നേർന്നു.

ലഹരിവിരുദ്ധ ബോധവത്കരണത്തിനൊപ്പം സാമൂഹിക പ്രതിബദ്ധതയും സേവനമനോഭാവവും വളർത്തുക എന്ന ലക്ഷ്യത്തോടെയാണ് പരിപാടികൾ സംഘടിപ്പിച്ചത്.