ഭക്ഷ്യ-സിവില്‍ സപ്‌ളൈസ്

വകുപ്പ് മന്ത്രിയുടെ കാര്യാലയം, തിരുവനന്തപുരം

വാര്‍ത്താക്കുറിപ്പ്

06/10/2026

നെല്ല് സംഭരണം: തടസങ്ങള്‍ നീങ്ങി

-------------------------------------------

മില്ലുകളുമായി ധാരാണാപത്രത്തിന്

പ്രത്യേകാനുമതി: മന്ത്രി അനൂപ് ജേക്കബ്

കഴിഞ്ഞ സീസണില്‍ കരാറിലേര്‍പ്പെട്ടതും നിശ്ചിതസമയത്തിനകം നെല്ല് കുത്തല്‍ (മില്ലിംഗ്) പൂര്‍ത്തിയാക്കാന്‍ കഴിയാത്തതുമായ മില്ലുകളുമായി കരാറില്‍ ഏര്‍പ്പെടാന്‍ സപ്‌ളൈേകാക്ക്് നിബന്ധനകളോടെ പ്രത്യേക അനുമതി നല്‍കിയതായി മന്ത്രി അനൂപ് ജേക്കബ് അറിയിച്ചു. ഇതു സംബന്ധിച്ച ശിപാര്‍ശ സപ്‌ളൈകോ ഭക്ഷ്യവകുപ്പിനു നല്‍കിയിരുന്നു.

2026 ഖാരിഫ് സീസണിലേക്കുള്ള നെല്ല് സംഭരണ പ്രവര്‍ത്തനങ്ങള്‍ സമയബന്ധിതമായി ആരംഭിക്കേണ്ടതും യോഗ്യതയുള്ള അരിമില്ലുകളുമായി കരാറുണ്ടാക്കേണ്ടതിന്‍െ്‌റ ആവശ്യകതയും കണക്കിലെടുത്താണു നടപടി. ഇതോടെ നെല്ല് സംഭരണം സംബന്ധിച്ചു നിലവിലുള്ള ആശങ്കകള്‍ക്കു വിരാമമാകുമെന്നു മന്ത്രി അറിയിച്ചു.

മില്ലുകളുമായുള്ള കരാറുകള്‍ എത്രയും വേഗം നടപ്പാക്കേണ്ടതുണ്ട്. മില്ലിംഗ് കാലയളവ് നീട്ടല്‍ അനുമതി കേന്ദ്ര സര്‍ക്കാരിന്‍െ്‌റ അംഗീകാരത്തിനു വിധേയമായിരിക്കും. 2025- 26 ഖാരീഫ് സീസണിലെ നെല്ല് കുത്തിത്തീര്‍ക്കുന്നതിനുള്ള സമയം ജൂലൈ 31ന് അവസാനിച്ച സാഹചര്യത്തില്‍ 2026 ഒക്ടോബര്‍ 31 വരെ നീട്ടാന്‍ കേന്ദ്രത്തോട് അഭ്യര്‍ഥിച്ചിട്ടുണ്ട്. 2025-26 റാബി സീസണിലെ നെല്ല് കുത്തിതീര്‍ക്കാന്‍് 2027 ജനുവരി 31 വരെ സമയം കേന്ദ്ര സര്‍ക്കാര്‍ നിലവില്‍ അനുവദിച്ചിട്ടുണ്ട്. ഇക്കാര്യത്തില്‍ കേന്ദ്രനിര്‍ദ്ദേശങ്ങള്‍ സപ്ലൈകോ കര്‍ശനമായി പാലിക്കണം. കേന്ദ്രം നിശ്ചയിച്ചിട്ടുള്ള ഔട്ട്-ടേണ്‍ അനുപാതം ഉള്‍പ്പെടെയുള്ള എല്ലാ വ്യവസ്ഥകളും പാലിക്കണം.

കഴിഞ്ഞ സീസണിലെ മില്ലിംഗ് പൂര്‍ണ്ണമായും പൂര്‍ത്തിയാകുംവരെ കാത്തിരിക്കുന്നതു നെല്ല് സംഭരണം ആരംഭിക്കാന്‍ തടസമാകുമെന്നു വിലയിരുത്തിയാണു വ്യവസ്ഥകള്‍ക്കു വിധേയമായി അനുമതി നല്‍കിയത്. കഴിഞ്ഞ ഖാരിഫ് സീസണിലെ മില്ലിംഗ് കാലയളവ് ജൂലൈ 31 ന് അവസാനിച്ചെങ്കിലും, വിവിധ കാരണങ്ങളാല്‍ സമയപരിധിക്കകം മില്ലിംഗ് പൂര്‍ത്തിയാക്കാനായില്ല.

കഴിഞ്ഞ സീസണില്‍ നെല്ല് സംഭരിച്ച ബന്ധപ്പെട്ട ഒരോ മില്ലിലും ലഭ്യമായ നെല്ലിന്റെ സ്റ്റോക്ക്, കരാറില്‍ ഏര്‍പ്പെടുംമുമ്പ് സപ്ലൈകോ ഉദ്യോഗസ്ഥര്‍ പരിശോധിച്ചു വിലയിരുത്തും. മുന്‍ സീസണിലെ ബാക്കി നെല്ലും അനുബന്ധ ബാധ്യതകളും കൃത്യമായി കണക്കില്‍പ്പെടുത്തിയിട്ടുണ്ടെന്നും, നിശ്ചിത കാലയളവിനകം മില്ലിംഗ് പൂര്‍ത്തിയാക്കുമെന്നും, അരി സപ്ലൈകോ/സര്‍ക്കാരിന് എത്തിക്കുമെന്നുമുള്ള സത്യവാങ്മൂലം മില്‍ ഉടമ സപ്ലൈകോയ്ക്കു സമര്‍പ്പിക്കണം. കരാറില്‍ മില്ലുകളെ ഉള്‍പ്പെടുത്തുന്നത് അവയുടെ സ്റ്റോക്ക് പരിശോധനയ്ക്കും സത്യവാങ്മൂലവും പരിഗണിച്ചാവും.

കഴിഞ്ഞ സീസണുകളിലെ സ്റ്റോക്ക്, മില്ലിംഗ്, അരി വിതരണ അക്കൗണ്ടുകള്‍ പ്രത്യേകമായും വ്യക്തമായും സൂക്ഷിക്കണം. ബാക്കി നെല്ല്/ അരി കൂട്ടിക്കലര്‍ത്തുകയോ പരസ്പരം മാറ്റി കണക്കാക്കുകയോ ചെയ്യരുത്.

പ്രത്യേക അനുമതിയില്‍ ഉള്‍പ്പെടുത്താന്‍ ഉദ്ദേശിക്കുന്ന മില്ലുകളുടെ പട്ടിക കൃത്യമായി പരിശോധിച്ചുറപ്പിച്ച രേഖകളുടെ അടിസ്ഥാനത്തിലാണെന്നും 2025-26 ഖാരിഫ്, റാബി സീസണുകളുമായി ബന്ധപ്പെട്ട ബാക്കി നെല്ല്, മില്ലിംഗ് നില, ബാധ്യതകള്‍ എന്നിവയുടെ വിശദാംശങ്ങള്‍ കൃത്യമായും വെവ്വേറെയും പരിപാലിക്കുന്നുണ്ടെന്നും സപ്ലൈകോ മാനേജിംഗ് ഡയറക്ടര്‍ ഉറപ്പാക്കണം.

പ്രത്യേകാനുമതി ഉത്തരവില്‍ ഉള്‍പ്പെട്ട മില്ലുകളുടെ വിശദാംശങ്ങള്‍, ഓരോ മില്ലിലും ലഭ്യമായ നെല്ലിന്റെ സ്റ്റോക്ക്, അതത് വിള സീസണുകളില്‍ മില്ലിംഗ് ചെയ്യാന്‍ ശേഷിക്കുന്ന അളവ്, അനുബന്ധ മില്ലിംഗ്, ബാധ്യതകളുടെ അവസ്ഥ എന്നിവ ഉള്‍ക്കൊള്ളുന്ന സംയോജിത പ്രസ്താവന സപ്ലൈകോ മാനേജിംഗ് ഡയറക്ടര്‍ സര്‍ക്കാരിനു സമര്‍പ്പിക്കണമെന്നു നിര്‍ദ്ദേശിച്ചിട്ടുണ്ടെന്നും മന്ത്രി അറിയിച്ചു.

അധിക വിവരങ്ങള്‍

-----------------

നെല്ല് സംഭരണ സീസണ്‍ രണ്ടു വിളകളായി തിരിച്ചിരിക്കുന്നു. ഇതില്‍ ഒന്നാം വിള (ഖാരിഫ്) 2025 സെപ്റ്റംബര്‍ മുതല്‍ 2026 മാര്‍ച്ച് 31 വരെ സംഭരണം നടത്തി 2026 ജൂലൈ 31-നകം മില്ലിംഗ് പൂര്‍ത്തിയാക്കണം. 2026 ഏപ്രില്‍ 1 മുതല്‍ 2026 ജൂലൈ 31-നകം സംഭരണം നടക്കുന്നു.

രണ്ടാം വിള (റാബി) 2027 ജനുവരി 31-നകം മില്ലിംഗ് പൂര്‍ത്തിയാക്കുന്നു. രണ്ട് വിളകള്‍ക്കും പ്രത്യേക രേഖകള്‍ സൂക്ഷിക്കുന്നു. ഏതെങ്കിലും വിളയുടെ മില്ലിംഗ് അനുവദനീയമായ സമയപരിധിക്കുള്ളില്‍ പൂര്‍ത്തിയായില്ലെങ്കില്‍, മില്ലിംഗ് കാലയളവ് നീട്ടുന്നതിനുള്ള അനുമതി ഭക്ഷ്യ-പൊതുവിതരണ വകുപ്പില്‍ നിന്ന് നേടേണ്ടതുണ്ട്.

-------------------------------------------

ഭക്ഷ്യ-സിവില്‍ സപ്‌ളൈസ്

വകുപ്പ് മന്ത്രിയുടെ കാര്യാലയം, തിരുവനന്തപുരം

വാര്‍ത്താക്കുറിപ്പ്

06/10/2026

കേന്ദ്രമന്ത്രി സുരേഷ് ഗോപിക്ക് കത്തയച്ചു

------------------------------------------

മണ്ണെണ്ണ വിഹിതം 9,564 കിലോലിറ്ററായി

വര്‍ധിപ്പിക്കണം: മന്ത്രി അനൂപ് ജേക്കബ്

സംസ്ഥാനത്തിനുള്ള ത്രൈമാസ മണ്ണെണ്ണ വിഹിതം വര്‍ദ്ധിപ്പിക്കണമെന്ന് മന്ത്രി അനൂപ് ജേക്കബ് കേന്ദ്ര പെട്രോളിയം സഹമന്ത്രി സുരേഷ് ഗോപിക്ക് അയച്ച കത്തില്‍ അഭ്യര്‍ഥിച്ചു. 4,068 കിലോലിറ്റര്‍ മണ്ണെണ്ണയാണു നിലവില്‍ ത്രൈമാസ വിഹിതം. അതു 9,564 കിലോലിറ്ററായി വര്‍ധിപ്പിക്കണമെന്നാണു ആവശ്യം.

സാമ്പത്തിക ദുര്‍ബലവിഭാഗങ്ങള്‍, കുടിയേറ്റ തൊഴിലാളികള്‍, മറ്റു പിന്നാക്കവിഭാഗങ്ങള്‍ എന്നിവര്‍ സബ്‌സിഡി മണ്ണെണ്ണ ആശ്രയിക്കുന്നതിനാല്‍, സംസ്ഥാന സര്‍ക്കാരിന് വിതരണഅളവ് 0.5 ലിറ്ററില്‍ നിന്ന് ഒരുലിറ്ററായി വര്‍ധിപ്പിക്കാതെ മറ്റു മാര്‍ഗമില്ല.

തീരദേശ, കുന്നിന്‍ പ്രദേശങ്ങള്‍, വിദൂര നാടുകള്‍ എന്നിവിടങ്ങളില്‍ ഗാര്‍ഹിക ആവശ്യങ്ങള്‍ക്കായി മണ്ണെണ്ണയെ ആശ്രയിക്കുന്ന കുടുംബങ്ങളുടെ എണ്ണം കേരളത്തില്‍ ഗണ്യമാണ്. എല്‍പിജി വിതരണനിയന്ത്രണം മൂലം മണ്ണെണ്ണയ്ക്കും മറ്റു പാചകഇന്ധനങ്ങള്‍ക്കും ആവശ്യം വര്‍ധിച്ചു. സംസ്ഥാനത്ത് 95.5 ലക്ഷം റേഷന്‍ കാര്‍ഡ് ഉടമകളുണ്ട്. 2026-27 ലെ ആദ്യപാദത്തില്‍ 5496 കെഎല്‍ അധികവിഹിതം അനുവദിക്കണമെന്ന് സിവില്‍ സപ്ലൈസ് കമ്മിഷണര്‍ ഇന്ത്യാ സര്‍ക്കാരിനോട് നേരത്തെ അഭ്യര്‍ഥിച്ചിരുന്നതായും കത്തില്‍ ചൂണ്ടിക്കാട്ടുന്നു.

മണ്ണെണ്ണ വിഹിതം കേന്ദ്രം വെട്ടിക്കുറച്ചതോടെ കേരളം കടുത്ത മണ്ണെണ്ണ ക്ഷാമത്തിലേക്ക് നീങ്ങുകയാണ്. മുമ്പു ലഭിച്ചിരുന്ന 56.76 ലക്ഷം ലിറ്ററില്‍ നിന്ന് ഇത്തവണ ഒക്ടോബര്‍-ഡിസംബര്‍ പാദത്തിലും വിഹിതം 40.68 ലക്ഷം ലിറ്ററായി തന്നെ കേന്ദ്രം പരിമിതപ്പെടുത്തി. ഇതിലൂടെ ആകെ 16.08 ലക്ഷം ലിറ്ററിന്റെ കുറവാണു സംസ്ഥാനത്തിനുണ്ടായത്.

നിലവിലെ വിഹിതം അനുസരിച്ച് 5.94 ലക്ഷം വരുന്ന മഞ്ഞ കാര്‍ഡുകാര്‍ക്ക് മൂന്നുമാസത്തിലൊരിക്കല്‍ 1 ലിറ്റര്‍ വീതവും, പിങ്ക്, നീല, വെള്ള കാര്‍ഡുകാര്‍ക്ക് അര ലിറ്റര്‍ വീതവുമാണു മണ്ണെണ്ണ നല്‍കുന്നത്. എന്നാല്‍ വിഹിതം പകുതിയോളം കുറഞ്ഞതോടെ എല്ലാ കാര്‍ഡുടമകള്‍ക്കും ഇതു ലഭ്യമാക്കാന്‍ സാധിക്കാത്ത സാഹചര്യമാണുള്ളത്.

പരമ്പരാഗത മത്സ്യത്തൊഴിലാളികളുടെ വള്ളങ്ങള്‍ക്ക് എഞ്ചിന്‍ ശേഷി അനുസരിച്ച് വലിയ അളവില്‍ മണ്ണെണ്ണ ആവശ്യമാണ്. റേഷന്‍ വിഹിതത്തില്‍ നിന്നുകൂടി ഇവര്‍ക്കു മണ്ണെണ്ണ നല്‍കേണ്ടി വരുന്നതു പ്രതിസന്ധി രൂക്ഷമാക്കുന്നു. പലരും ഉയര്‍ന്ന വിലനില്‍കി പുറംവിപണിയില്‍ നിന്നാണ് ഇപ്പോള്‍ മണ്ണെണ്ണ വാങ്ങുന്നത്.

വിഹിതം വെട്ടിക്കുറച്ചതിനൊപ്പം റേഷന്‍ മണ്ണെണ്ണയുടെ വിലയും കേന്ദ്രം വര്‍ധിപ്പിച്ചിട്ടുണ്ട്. നിലവില്‍ റേഷന്‍ കടകള്‍ വഴി ലിറ്ററിന് 71 രൂപ മുതല്‍ 76 രൂപ വരെ നിരക്കിലാണു മണ്ണെണ്ണ വിതരണം ചെയ്യുന്നത്.